lost

من الآن لا داعى للسير فى الطريق الذى كنت أظنه هو الصحيح لا داعى لكى أكمل طريق بدأته منذ زمن بعيد ولا أجد له نهايه , مللت من طول الإنتظار لشئ أتمناه . فربما ينتهى بى العمر قبل أن أصل إليه وربما لا يسعى هو ليساعدنى كى أجده.
إختفت الكلمات من أمامى ولم يتبقى لى سوى قرارى
سأسلك الطريق الأخر واكمل حياتى بشكل ولون مختلفين فربما أجد هناك شئ يسعدنى وربما قد ينتهى بى المطاف فوداعا لشخص طال إنتظاره ووداعا لكل من ساهم فى إمدادى بالأمل

Money

راحة سلبية

شوية موسيقى تصويرية
جائنا البيان التالى:-
النهاردة بدأت فترة الراحة السلبية الخاصه بية ........
النهارده خلاص خلصت المجموعات اللى كانت معايا وقررت أخد راحة سلبية قبل الجيش زى لعيبة الكوره.
خلاص معتش فى صحيان بدرى واروح المنصورة , من هنا لحد ميعاد الجيش هاكل وانام وبس عشان اعوض مقدماَ :D :D
بس بجد انا زعلت جدا النهارة , هايوحشنى جدا لاب شركة مصر اى تى اللى كنت بشرح فيه , وكمان هايوحشنى لاب أى تى واى
بس هو دايما كده كل فترة ولازم تنتهى ونزعل على نهايتها بس الفتره اللى بعدها بتكون أحسن....
أنا بتمنى تكون فترة الجيش أحسن من اللى فاتوا وربنا يوفقنى فيه ان شاء الله ويعدى على خير.
دعواتكم ياجماعه معايا الفتره الجايه دى
وإلى هنا انتهى بثنا المباشر , دمتم بالصحه والعافيه أعزائى المشاهدين

المجند البائس

انا النهارده جاى أحكى حكايتى مع التجنيد من طأطأ ل عليكو السلام
خلصت الكليه وانا شاب لسه باقى برج فى دماغى ماطارش , وطلعت النتيجه وقولت أروح أشوف موضوع التجنيد .
روحت سألت طلبوا منى لسته بالأوراق المطلوبه , وكل مستند ليه معايا حكايه وحدوته.
نبدأ بالفيش الجنائى:
روحت على المركز عشان أعمل الفيش الجنائى قالولى انت نص أول فى التجنيد فلسه مجاش أوامر نعمل فيشات استنيت اسبوع لجد مااكتشفت انهم كانوا بيشتغلونى عشان يريحوا نفسهم فروحت عملت معاهم مشكله وعملت الفيش اللى جه متأخر وكنت هاتخلف عن تجنيدى بسببه بس ربنا ستر .

ثانيا فصيلة الدم:
روحت المستشفى عشان أطلع فصيلة دم فالممرضه ربنا يجازيها تشكنى بانتقام وبعد مااستنى شويه تقولى العينه باظت وتشكنى بانتقام تانى وتبوظ العينه تانى وتشكنى تالت واخيرا تقولى فصيلة الدم الى هى ف الاخر على مااتذكر A+

ثالثا القيد العائلى:
روحت السجل المدنى اللى فى عمارة الجميل اللى ف المنصوره وفضلت واقف ساعه الا ربع فى الصف الطوييييييل اللى مابيمشيش واخيرا بعد ماوصلت بالسلامه عند امين الشرطه يقولى بكل بجاحه مواليد بلقاس من اول النهارده هايروحوا يطلعوا القيد العائلى من مديرية امن المنصوره الى قدام كوبرى طلخا وبعد عذاااااااااااب هناك الحمد لله عرفت اطلع القيد العائلى

رابعا شهادة التخرج:
حكيت انا على الى حصلى ف البوست اللى فات لكن ربنا ستر وطلعت فى كام يوم كده ربنا يخلى الروتين ف مصر

خامسا شهادة ميلاد كمبيوتر:
دى طلعت بسهوله جدااااااااااااااااااااااااااااااااااا لمجرد ان الراجل لما شافنى حالق شعرى شك انى ظابط فمشهالى بسرعه الحلاقه جابت نتيجه يعنى :D

سادسا موقف من التجنيد: اللى هى بطاقة 6 جند
طبعا كل الشباب عارفينها اللى كنا قدمنا صوره منها للكليه , المهم جيت ادور عليها فافتكرت انى كنت نزلت بيها البحر وانا فى راس البر وضاعت منى روحت راس البر ونزلت البحر لكن للاسف معترتش فيها :D :D
المهم طلعت بدل فاقد مع نفس الراجل اللى كان فاكرنى ظابط ولما عرف يومها انى مش ظابط سابنى واقف لما خللت فى الصف :D :D

سابعا الفيش الثلاثى :
روحت عملته فى يوم واحد-ده طبعا بعد مالعسكرى قعد يماطل لحد مااكتشفت انه عاوز فلوس - بعد ماكملت كل الورق اللى فات ده عشان أكتشف ان الكشف الطبى بتاع الكليه عدى وانا هاكشف فى الإستثنائات وأخدت ميعاد الكشف وإتكلت على الله

ثامنا الكشف الطبى:
طبعا مش هاينفع أحكى هنا اللى حصل هناك بس اهو يوم بهدله هو كمان وعدى على خير وكنا لسه قبل رمضان بس يومها استلمت بطاقة 110 جند اللى طلع مكتوب فيها انى مرشح ظابط احتياط وبصمونى على كده إجبارى بمبدأ إبصم من غير ماتسأل احنا عارفين مصلحتك فين :D

تاسعا بئا يوم الإرجاء:
الإرجاء أو الإرجا زى مابنقول او زى مابيطلق عليه فى التجنيد يوم الحشر الأصغر لأن بيكون هناك أكتر من 12 ألف واحد رايحين يعرفوا موقفهم ايه من التجنيد وكنا فى رمضان وسابونا مرميين ف الحر من 6 الصبح لحد 2 ونص
ده اليوم الى بنعرف فيه الأيام اللى دخلت الجيش والأيام اللى أخدت تأجيل وأفاجأ ان يومى أخد تأجيل وفرحت لكن هافضل قاعد عشان اعرف هاياخدوا تخصصات ايه لان التخصصات مابتاخدش تأجيل . فالعميد قعد ينده التخصصات طب وهندسه وعلوم وألسن واحنا مرعوبين وفى الاخر ينده معهد تمثيل ومسرح فوقتها احنا اتطمنا جداااااااااا وفرحنا وخصوصا لما سكت بعدها وبدأ يعيد التخصصات فااحنا قولنا يبقى كده هما مش عاوزين حاسبات ونفاجأ فى الأخر انه بيقول وطبعاااا كلية الحاسبات والمعلومات فمعنى كده اننا خلاص اتجندنا والمفروض نتحرك بعدها على كشف الهيئه فى حلمية الزيتون عشان نعرف احنا ظباط ولا عساكر .

عاشرا يوم كشف الهيئه فى حلمية الزيتون:
روحنا هناك وكشفنا كشف طبى تانى بس للظباط وبعد كده ندخل جوه لكشف الهيئه قدام شوية رتب توقع القلب فى الرجلين اللى يعجبهم جسمه يتكلموا معاه ويسألوه وبكده يبقى اتقبل ظابط احتياط إتسألنا واتبهدلنا وروحنا واحنا عارفين اننا ظباط احتياط

الحادى عشر يوم نتيجة كشف الهيئه فى سندوب :
روحنا واحنا متأكدين ميه ف الميه اننا ظباط العميد بدأ ينده الكليات لنكتشف ان كليتنا مااتندهتش خالص وبالتالى احنا عساكر زغرتنا وحضننا بعض وفرحنا وروحنا واحنا عارفين اننا عساكر لكن القدر لعب لعبته بإن واحد من الى معانا عرف بعدها بيومين ان كشف كليتنا كان بيتنده فى مكان تانى غير اللى كنا فيه وأسمائنا كلها اتندهت والخبر ده نزل علينا زى الصاعقه بس أكيد ان شاء الله خير

الثانى عشر إمتحان السمات فى مطار ألماظه:
ده لسه يوم الأحد الجاى بس دلوقتى خلاص بقينا رسميا ظباط احتياط بالجيش المصرى وربنا يخلي كليتنا اللى دايما مخليانا مميزين عن الناس منها لله :D

كل شباب الكليه يتعلموا بئا من اللى حصلنا ويخلصوا ورقهم بدرى بدرى بعد التخرج على طول قبل النتيجه ماتطلع تكونوا خلصتوا الحاجات الى مش محتاجه شهاده زى القيد العائلى وفصيلة الدم والفيش الجنائى وموقف التجنيد وربنا معاكم ومستنيكم ف الجيش

والى هنا اكون قد انتهيت بعد ماصدعتكم وكمان كده انا حاولت أختصر على أد مااقدربس ياريت محدش يدعى عليه واهو كله يهون عشان خاطرك يامصررررررررررررر

مرحله فى حياتى كان لازم تتسجل , وإنتظرونى مع سلسلة يوميات ظابط بالصدفه

ودى كانت نهاية حاسبات معايا

السلام عليكم ورحمة الله وبركاته
النهارده خلاص انتهى نسبة حبى القليله اوى لإدارة الكليه وللكليه.
كان باقى شوية حب صغيرين وضاعوا النهارده .
عشان أستلم شهادة التخرج قاعد من 9 الصبح لحد 4ونص العصر .
يعنى إيه نيجى ندفع مصاريف الشهاده ف خزنة علوم يقولولنا ماحدش من كليتكم جابلنا إذن صرف
ويعنى ايه لما نروح للعميده ومانلاقيهاش.
ويعنى ايه لما نروح لأمين الكليه يقولنا الى معاها المفتاح هاتيجى كمان ساعه ( الى هنا بئوا 3 ساعات واحنا مرميين عند الكليه)
ويعنى ايه لما نقف نراجع البيانات 4 ساعات ( الحاجه فاطمه تعبت معانا بجد النهارده , وبجد هى دى الانسانه الوحيده اللى بقيت بحترمها من موظفين الكليه)
ويعنى ايه ف الأخر ان الشهادات لازم العميده تعتمدها الأول قبل مايسلموهالنا والعميده مش موجوده
وعشان كده انا داخل النهارده عشان أقول ومن قلبى أنا خلاص كرهت حاسبات ومعتش هاعرف ادافع عن نظامها الإدارى بعد كده اللى بسببه اتبهدلنا 4 سنين .

بحار

أغنية جديده بس عجبتنى جدى أغنيه إسمها بحار بتغنيها فرقه اسمها بلاك تيم

بحار خايف من المشوار فى البحر وانت بعيد الموج تملى يزيد ويخبى ف الأسرار.
محبوب ومفكش أى عيوب مهما تغيب عالعين نورك على الشطين حبك قدر مكتوب.
وناس بتحب كل الناس صوتك يونسنى من نظرة تهوسنى وعنيك قمر للناس
. ................................................
وبدور وبعدى أى بحور تنهدنى وانا اروحلك تحضنى وابوحلك فى الحب عصفور بيدور.
محبوب ومفكش أى عيوب مهما تغيب عن العين نورك على الشطين حبك قدر مكتوب.
وناس بتحب كل الناس صوتك يونسنى من نظرة تهوسنى وعليك وعنيك قمر للناس .

فى ليلة عشق - فاروق جويده-

ما اجمل ان تجد امراه

تتلاشي فيك وتسكنها كطيور النهر

وتراها ترقص فوق الموج

كاغنيه عانقها البحر

وتخاف عليك من الدنيا

ومن الايام وغدر الدهر

في ليله حزن وحشيه

ما اجمل ان تجد امراه

توقظ افراحا منسيه

وتعيد ليالي ورديه

في رحله عمر مكتوبه

اجلس احيانا في سام

انظر في كاس مسكوبه

قطرات قد بقيت فيها

ما عادت كاسي مرغوبه

اجد الاحلام تراوغني

تبدو احيانا مصلوبه

تبدو احيانا مغلوبه

ما اسوا ان تلقي زمنا

بعيون ثكلي .... مثقوبه

زمن الاشياء المقلوبه

زمن بهمومي يتسلي

وربيع زهوري قد ولي

في عيني لؤلؤه نامت

والكون شموع تتدلي

ما اجمل ان تجد امراه

بدرا بسمائك يتجلي

في ليله عشق صيفيه

الامتحان رقم 41 والاخير

إمبارح كان اخر يوم امتحانات فى الكليه , كنت حاسس بإحساس غريب كأنى اول مره رايح أمتحن , حاسس انى قاعد قعده غريبه وعندى شوية مشاعير(مشاعر يعنى) متضاربه , شوية فرحان وشويه زعلان وشويه بفتكر انى قاعد ف الامتحان ولازم احل اى حاجه.

بس فعلا امبارح كان يوم غريب , بدايته صحيت من النوم كنت لسه ماذاكرتش الا نص الماده , قعدت كملتها وقعدت افتكر كل الامتحانات اللى عدت عليه فى الكليه امتحان امتحان , ودكتور كل ماده ومحاضراته اللى انا حضرت جزء منها والمعيدين وزمايلى اللى شرحولى حاجات قبل الامتحان ودخلت حليتها على شرحهم , كلللل الشريط ده عدى عليه امبارح , بسرعه امتحنت 41 ماده فى الكليه ( ده عشان حقوق الإنسان) .

بس النهارده انا مفتقد شعور الكليه , شعور انى كنت المفروض هاحضر محاضرات كمان فتره مع اصحابى , وهاخرج مع اصحابى اللى عارفهم بئالى 4 سنين , بس هى دى سنة الحياه , لازم كل مرحله تنتهى وندخل فى مرحله تانيه وسط ناس تانيين .

فى الاخر عاوز اشكر كل زمايلى واصحابى اللى ساعدونى فى الكليه , وبشكر منتدى نور الهدى ومنتدى كلية الحاسبات والمعلومات, وطبعا بشكر اخواتى واصحابى على صيام وعبد الله رمضان , وربنا معانا جميعا ان شاء الله .

نتيجة التربية العسكرية

من كام يوم كده ظهرت نتيجة التربيه العسكريه , النتيجه المشئومه ,والحمد لله طلعت ساقط فى التربيه العسكريه, ضاع سهر الليالى لحد الصبح عشان ماتروحش عليه نومه والبهدله بتاعة المواصلات الساعه 6 الصبح وكمان الشمس والعسكرى الحقير الحقير الحقير اللى كان معانا , بس فعلا ده جزائى انى ماعملتهاش كوسه زى الناس .

أنا داخل النهارده أعلن رسميا شيلى اول ماده فى كلية حاسبات المحروسه الا وهى التربيه العسكريه

وحسبى الله ونعم الوكيل فيك يافخررررررررررررررررى.

التخرج ونهاية لقب طالب

السلام عليكم ورحمة الله وبركاته

النهارده انا هاتكلم على اهم حدث فى حياتى العلميه المعمليه الفذه :D :D

اللى هو التخرج .

ده هو حال الحياه ندخل مكان غريب علينا نتعود عليه ونعرف ناس ونعيش معاهم وتيجى بعد كده لحظة الفراق اللى مكناش حاطينها ف دماغنا.انا النهارده معاداش عليه شريط الاربع سنين بس , انا عدى عليه شريط فيه كل مراحل الدراسه اللى مريت بيها بداية من اولى ابتدائى لحد البكارليوس الناس اللى عرفتهم واصحابى اللى عايش منهم لسه واللى توفى والمدارس اللى روحتها والدروس اللى اتعلمتها من معاملتى مع الناس . بالذات ف الكليه وعمرى ماانسى اول يوم دخلت فيه الكليه مكانش ليه اصحاب فيها خالص بس روحت يومها البيت وانا عارف اكتر من 30 زميل والنهارده وانا على مشارف التخرج عاوز اعتذر لاى حد اسأت ليه بقصد او بدون قصد وبتمنى ان ربنا يديم المحبه بينى وبين اصحابى وزمايلى وكلام كتير اوى مش عارف اعبر عنه.

خلاص التعليم خلص , المسئوليه بدأت والتركيز ف المستقبل والشغل والجواز بئا والعيال والخ الخ الخ

بعيد عن التخرج انا كاتب الموضوع ده عشان اكتب اللى انا فاكره من تجاربى ف الحياه من اولى ابتدائى لحد البكارليوس , وكمان اشكر الناس اللى وقفت جمبى وساعدتنى ف الكليه والناس اللى اتشرفت بمعرفتى ليهم سواء على النت اول وجها لوجه او حتى ف المنتديات الدراسيه وخاصة منتدى نور الهدى اللى انا بحترم كل اعضائه جدااااااااااااا وليهم مكانه خاصه فى قلبى

وفى النهايه الجزء الخاص بيه جدا / بشكر اصدقائى اللى طلعت بيهم من الكليه واللى ان شاء الله ربنا يكرمنا ونكمل حياتنا مع بعض

على صيام وعبد الله رمضان وبقولهم اكيد انتم فاهمين كلامى من غير مااقوله

وياريت ياجماعه اللى يدخل هنا يسيب كومنت عشان يبقى الموضوع ده نوته اتفرج عليها كل شويه ف المستقبل افتكر بيها احلى ايام حياتى واحسن ناس اتشرفت بمعرفتهم

واخر كلامى سلامى

السلام عليكم ورحمة الله وبركاته

Last Midterm

السلام عليكم ورحمة الله وبركاته

النهارده بئا انا داخل أتكلم عن آخر ميد تيرم ليه فى الكليه " إن شاء الله " , وانا طالع النهارده من اللجنه "وكالعاده مش مبسوط من الإمتحان" كنت حاسس بإحساس حلو كده انى معتش هاجرب شعور الامتحان بتاع الميدتيرم , طبعا الناس هاتقول ماهو لسه امتحانات الفاينال .!!!!!
بس انا هارد واقول انى بذاكر فى الترم مره واحده بس , وهى اللى قبل امتحانات الفاينال فبكون داخلها مرتاح نفسيا . أما امتحانات الميدتيرم بكون رايح الإمتحان زى البطيخه وأحيانا بروح من غير مااعرف انا هامتحن ايه :D :D .

بغض النظر عن الكلام اللى فوق ده كله , انا داخل أسجل اللحظه التاريخيه دى , عشان أبقى أفتكر اليوم ده . وياريت تدعولى ربنا يعدى امتحانات الفاينال على خير عشان أتخرج بئا , ونردهالكم فى جوازات عيالكم ان شاء الله :D :D

الصداقه

النهارده انا داخل أتكلم عن حاجه مهمه أوى فى حياتى , أكيد مهما إتكلمت مش هاعرف أوصف معنى الحاجه دى او حته اوصل بكلامى لوصف جزء من جمالها .

الحاجه دى هى الصداقه . أجمل حاجه فى حياتى , فضل ونعمه من ربنا سبحانه وتعالى .
أصدقائى دول بجد ناس مهما اتكلمت مش هاقدر أوفيهم حقهم , بيعيشوا معايا اجمل أيامى ويقاسمونى أحزانى , بلاقيهم معايا وقت الشده رجاله مالهمش حل .

انا مش عارف اعبر او اتكلم بس بجد انا فرحان اوى النهارده , لانى ليه اصحاب زى دول .

طبعا أنا ليه أصحاب كتير اوى بحبهم جدا فى الكليه وبره الكليه أصغر منى واكبر منى ومعايا ف الفرقه.

بس أكتر انسان فعلا قريب منى واخويه وكل حاجه هو على صيام أحسن إنسان قابلته فى حياتى اللى مهما اتكلمت عنه مش هاعرف اوفيه حقه . وكمان عبد الله رمضان راجل بمعنى الكلمه وصاحب لذيذ . دايما بنتبهدل احنا التلاته مع بعض وبنوصل برده مع بعض ف الأخر , واكتملت فرحتى كمان لما اشتغلنا احنا التلاته فى نفس الشركه , يعنى مع بعض مع بعض :D

وأحب أشكر كل المدونين الحاسوباتيين والغير حاسوباتيين اللى بيدخلوا المدونه وبيضيفوا ليها روح جميله

وفى الأخر بشكر كل اصحابى الحاسوباتيين والغير حاسوباتيين على كل حاجه وربنا يديم المحبه والصداقه للأبد . حتى بعد التخرج مش عاوز حد يخلع كده ولا كده :D .

سلامز

مولود جديد

السلام عليكم ورحمة الله وبركاته
النهارده داخل أسجل لحظه تاريخيه جديده :D , سجل عندك ياعم التاريخ
يوم 4-3-2009 الساعه 2 صباحا , دخل الحياه الواد كريم " ابن خالى " , واد زى القمر , ربنا يخليه وتبقى حياته كلها زى الفل
اناصورته اخيرا
واسيب البلوج بقى الوقتى واروح المستشفى تانى . ادعوله كده ياجماعه .
ونردهالكم فى عيالكم ان شاء الله :D :D
بس خلاص :D :D :D

الأعمى ذو العيون

هل شعرت يوماَ أنك لا ترى ,بالرغم من إدراكك لما يظهر حولك؟؟؟؟؟؟؟؟
هل أدركت يوما انا هناك عمى النفس بخلاف عمى العين؟؟؟؟؟؟
ترى فقط مايبدو لك على وجوه الناس ولا ترى ما يخفونه لك , ترى من يبتسم فى وجهم ولا ترى خداعه لك , ترى من يوفى لك أمامك ولا تراه وهو يدبر لجرحك .

هذا هو حال معظمنا , ننخدع بالمظاهر ونحكم على الناس من مظاهرهم ومن كلامهم المصطنع , ولا ندرى ما يدبرونه لنا فى خبايا أنفسهم .
ولكن من الأفضل اننا كذلك حتى نرى الحياه بعين جميله .

فأنا عن نفسى أحب أن أكون هذا الأعمى ذو العيون , حتى أتعامل مع الناس بطبيعتى دون أن أنتظر غدرهم .

قلبٌ زجاجى

اليوم , وفى هذا الوقت والتاريخ الذى يخط فيه قلمى هذه الكلمات على أوراقى , إكتشفت سر حز هذا القلم وآلام الأوراقِ .
اليوم قد إكتشفت أن هذه القلب الذى ينبض داخلى ليس قلبى ...!!!!!!!
نعم , ليس قلبى ولا هذه النبضات نبضاتى.................................
فقلبى ليس معى , تخلى عنى مثلما فعل الكثير , تركنى لأحيا فى هذه الدنيا بلا قلب , حتى صنعت لنفسى دون قصد قلب من زجاج.......

قلب من زجاج , أعانى من إنكساره كلما ألقى الزمان على حصوة من غدره , قلب يراه الناس فيتفهموا مدى طيبته وشفافيته فيغدرون به دون أن يفكرون فى حالته بعد غدرهم.

ولكنى اليوم قد سئمت هذا القلب الزجاجى الكسير دوماَ , ففكرت بنفسى قبل ذلك , فكرت بنفسى من زمن ليس بقريب ولا ببعيد ........

تذكرت أنه كنت أمتلك قلب كبير . قلب يقوى على تحمل الآلام قلب يقوى على منافسة هذا الزمان .....
ولكن, أين هذا القلب . لا أذكر سوى ملامح قليلة منه , إستعدت ذكريات زمانى عندما تخلى عنى أقرب الناس إلى , تذكرت كيف ضحيت بهذا القلب فكنت أنا السبب فى ضياعه .......

ولكنى عندما نظرت إلى الدنيا بنظره صحيحه علمت ما لم أكن قد أعرفه..................
وعندها عاد إلى قلبى , عاد عندما علم أننى أخطأت فى إعطائه لمن لا يستحق , واليوم أحيا بقلبى لننسى كل آلام الماضى وننتظر معا حياه أفضل , حتى نعوض ما أضعناه...........

أسجل هذا اليوم , لانه يوما إتخذت فيه قرار , عجزت عن إتخاذه ثلاثة أعوام ونصف العام , قرار لا يمكن الرجوع فيه , لأنه قرار بدون قلب زجاجى .

وداعاَ أيها القلب الزجاجى.......................

أنشودة الضرير لمشارى راشد

النهارده اول مره أسمع أنشودة الضرير لمشارى راشد العفاسى , لما سمعت الكلمات وحسيت بيها إتأثرت أوى وكمان حسيت ان الكلام لمسنى اوى.
دى كلمات الأنشوده :

يا امي ماشكل السماء وما الضياء وما القمر؟ ... بجمالها تتحدثون ولا أرى منها أثر
هل هذه الدنيا ظلام في ظلام مستتر ... يا أمي مدي لي يديكي حتى يزايلني الضجر

********

أمشي أخاف تعثرا وسط النهار او السحر ... لا أهتدي في السير إن طال الطريق وإن قصر
أمشي أحاذر أن يصادفني إذا أخطو خطر ... والأرض عندي يستوي منها البسائط والحفر

********


عكازتي هي ناظري هل في جماد من نظر؟ ... يجري الصغار ويلعبون ويرتعون ولا ضرر
وأنا ضرير قاعد في عقر داري مستقر ... الله يلطف بي ويصرف ما أقاسي من كدر

البقاء والدوام لله

النهارده , توفى رجل , من أكتر الناس الى كنت بحبهم , شخصية الواحد كان يفتخر انه يعرفه او حتى يتكلم معاه .
كنت كل مره أتكلم معاه أتعلم منه حاجه جديده , دايما ينصحنا للصح , وينبهنا لحاجات كتير ماكناش ناخد بالنا منها.
وكنت لما أصلى وراه , كان صوته حلو جدا ماشاء الله . ووجهه دائما مضئ .

الى توفى خالى الشيخ فاروق مجود رحمه الله
بجد أنا لما سمعت الخبر النهارده , إتصدمت وحسيت بإحساس اول مره احسه ف حياتى , زعلت جدا ونفس الوقت كنت مرتاح نفسيا
لان الراجل ده ان شاء الله مثواه الجنه, ونحتسبه ان شاء الله شهيداَ .
بس اللى زعلنى بس هو إحساس الفراق , بس ان شاء الله ربنا يجمعنا تانى على خير ان شاء الله

أنا داخل أسجل اليوم ده بالذات , لان الحدث ده هايفضل مفكرنى باليوم ده طول حياتى .
أنا مش عارف أقول كل اللى جوايا بس ياريت كل اللى يدخل الموضوع ده يدعيله بالرحمه

اللهم ابدله دارا خيرا من داره واهلا خيرا من اهله وادخله الجنة واعذه من عذاب القبر ومن عذاب النار .
اللـهـم عاملة بما انت اهله ولا تعامله بما هو اهله .
اللـهـم اجزه عن الاحسان إحسانا وعن الأساءة عفواً وغفراناً.
اللـهـم إن كان محسناً فزد من حسناته , وإن كان مسيئاً فتجاوز عن سيئاته .
اللـهـم ادخله الجنة من غير مناقشة حساب ولا سابقة عذاب .
اللـهـم اّنسه في وحدته وفي وحشته وفي غربته.
اللـهـم انزله منزلاً مباركا وانت خير المنزلين .
اللـهـم انزله منازل الصديقين والشهداء والصالحين وحسن اولئك رفيقا .
اللـهـم اجعل قبره روضة من رياض الجنة ,ولا تجعله حفرة من حفر النار .
اللـهـم افسح له في قبره مد بصره وافرش قبره من فراش الجنة .
اللـهـم اعذه من عذاب القبر ,وجاف ِالارض عن جنبيها .
اللـهـم املأ قبره بالرضا والنور والفسحة والسرور.
اللـهـم إنه فى ذمتك وحبل جوارك فقه فتنة الفبر وعذاب النار , وانت أهل الوفاء والحق فاغفر له وارحمه انك انت الغفور الرحيم.
اللـهـم انه عبدك وابن عبدك خرج من الدنيا وسعته ومحبوبيه وأحبائه إلي ظلمة القبر وماهو لاقته .
اللـهـم انه كان يشهد أنك لا إله الا انت وأن محمداً عبدك ورسولك وانت اعلم به.
اللهم ثبته عند السؤال
اللهم انا نتوسل بك اليك ونقسم بك عليك ان ترحمه ولا تعذبه
اللـهـم انه نَزَل بك وأنت خير منزول به واصبح فقير الي رحمتك وأنت غني عن عذابه .
اللـهـم اّته برحمتك ورضاك وقه فتنه القبر وعذابه و أّته برحمتك الامن من عذابك حتي تبعثه إلي جنتك يا أرحم الراحمين .
اللـهـم انقله من مواطن الدود وضيق اللحود إلي جنات الخلود .
اللـهـم إحمه تحت الارض واستره يوم العرض ولا تخزه يوم يبعثون "يوم لا ينفع مال ولا بنون إالا من أتي الله بقلب سليم"
اللـهـم يمن كتابه ويسر حسابه وثقل بالحسنات ميزانه وثبت علي الصراط
اقدامه واسكنه في اعلي الجنات بجوار حبيبك ومصطفاك (صلي الله عليه وسلم) .
اللـهـم اّمنه من فزع يوم القيامة ومن هول يوم القيامة وأجعل نفسه أّمنة مطمئنة ولقنه حجته .
اللـهـم اجعله في بطن القبر مطمئن وعند قيام الاشهاد أمن وبجود رضوانك واثق وإلي أعلي درجاتك سابق .
اللـهـم اجعل عن يمينه نوراً حتي تبعثه اّمنً مطمئن في نور من نورك .
اللـهـم انظر اليه نظرة رضا فإن من تنظر إليه نظرة رضا لا تعذبه ابداً
اللـهـم أسكنه فسيح الجنان واغفر له يارحمن وارحم يارحيم وتجاوز عما تعلم ياعليم .
اللـهـم اعفو عنه فإنك القائل "ويعفو عن كثير"
اللـهـم انه جاء ببابك وأناخ بجنابك فَجْد عليه بعفوك وإكرامك وجود إحسانك .
اللـهـم إن رحمتك وسعت كل شيء فارحمه رحمة تطمئن بها نفسه وتقر به عينه .
اللـهـم احشره مع المتقين إلي الرحمن وفداً .
اللـهـم احشره مع اصحاب اليمين واجعل تحيته سلام لك من أصحاب اليمين .
اللـهـم بشره بقولك "كلوا واشربوا هنئياً بما أسلفتم في الايام الخالية" .
اللـهـم اجعله من الذين سعدوا في الجنة خالدين فيها مادامت السموات والارض .
اللـهـم لا نزكيه عليك ولكنا نحسبه انه اّمن وعمل صالحاً فاجعل له جنتين ذواتي أفنان بحق قولك:
"ولمن خاف مقام ربه جنتان"
اللـهـم شفع فيه نبينا ومصطفاك واحشره تحت لوائه واسقه من يده الشريفة شربة هنيئة لا يظمأ بعدها ابداُُ .
اللـهـم اجعله في جنة الخلد التي وعد المتقون كانت جزاءً ومصيراُ لهم ما يشاءون وكان علي ربك وعداُ ومسئولاً .
اللـهـم إنه صبر علي البلاء فلم يجزع فامنحه درجة الصابرين الذين يوفون اجورهم بغير حساب
فإنك القائل " إنما يوفي الصابرون أجرهم بغير حساب "
اللـهـم انه كان مصلي لك ,فثبنه علي الصراط يوم تزل الاقدام .
اللـهـم انه كان صائم لك , فأدخله الجنة من باب الريان.
اللـهـم انه كان لكتابك تالي وسامع فشفع فيه القراّن وارحمه من النيران ,واجعله يارحمن
يرتقي في الجنة إلي اّخر اّية قرأها أو سمعها وأخر حرف تلاه
اللـهـم ارزقه بكل حرف في القراّن حلاوة , وبكل كلمة كرامة وبكل اّية سعادة وبكل سورة سلامة وبكل جْزءٍ جَزاءً .
اللـهـم ارحمه فانه كان مسلم واغفر له فانه كان مؤمنً.
وادخله الجنه فانه كان بنبيك مصدقً وسامحه فانه كان لكتابك مرتل.
اللـهـم اغفر لحينا وميتنا وشاهدنا وغائبنا وصغيرنا وكبيرنا وذَكّرنَا وأنثانا .
اللـهـم من أحييته منا فأحيه علي الاسلام ومن توفيته منا فتوفه علي الايمان .
اللـهـم لا تحرمنا أجره ولا تضللنا بعده .
اللـهـم ارحمنا اذا اتانا اليقين ,وعرق منا الجبين ,كشر الانين والحنين
اللـهـم ارحمنا اذا يئس منا الطبيب ,وبكي علينا الحبيب وتخلي عنا القريب والغريب
وارتفع النشيج والنحيب .
اللـهـم ارحمنا اذا اشتدت الكربات وتوالت الحسرات واطبقت الروعات وفاضت العبرات ,
وتكشفت العورات وتعطلت القوي والقدرات .
اللـهـم ارحمنا اذا بلغت التراقي وقيل من راق وتأكدت فجيعة الفراق للأهل والفراق
وقد حَمً القضاء فليس من واق
اللـهـم ارحمنا اذا حملنا علي الاعناق ألي ربك يومئذ المساق وداعا ابديا للدور الاسواق والاقلام
والاوراق الي من تذل له الجباه والاعناق .
اللـهـم ارحمنا اذا ورينا التراب وغلقت القبور والابواب وانقض الاهل والاحباب فإذا الوحشة والوحدة وهول الحساب .
اللـهـم ارحمنا اذا فارقنا النعيم وانقطع النسيم وقيل ماغرك بربك الكريم
اللـهـم ارحمنا اذا أقمنا للسؤال وخاننا المقال ولم ينفع جاه ولامال ولا عيال وقد حال الحال وليس الا فضل الكبير المتعال .
اللـهـم ارحمنا اذا نَسي اسمنا ودَرس رسمنا وأحاط بنا قسمنا ووسعنا .
اللـهـم ارحما اذا اَهملنا فلم يزرنا زائر ولم يذكرنا ذاكر ومالنا من قوة
ولا ناصر فلا امل الا في القاهر القادر الغافر يامن اذا وعد وفي , واذا
توعد عفا , وشفع يارب فينا حبيبنا المصطفي واجعلنا ممن صفا ووفا وبالله
إكتفي يا ارحم الراحمين ياحي يا قيوم يا بديع السموات والارض ياذا الجلال
والاكرام .
اللـهـم انه عبدك و ابن عبدك و ابن امتك مات و هو يشهد لك بالوحدانية و لرسولك بالشهادة فأغفر له إنك انت الغفار.
اللـهـم لا تحرمنا اجره ولا تفتنا بعده و اغفر لنا و له و اجمعنا معه في جنات النعيم يا رب العالمين .
اللـهـم انزل علي اهله الصبر والسلوان و ارضهم بقضائك.
اللـهـم ثبتهم علي القول الثابت في الحياه الدنيا وفي الاخره ويوم يقوم الاشهاد.
يارب اللهم ان كان ضيفي لكنت أكرمته , وهو الان ضيفك فأكرمه بكرمك ورحمتك يا أرحم الراحمين
آمين آمين آمين
يا رب العرش العظيم
واللـهـم صلي وسلم وبارك علي سيدنا محمد وعلي اّله وصحبه وسلم إلي يوم الدين

عدت الاو اس وبدأت الأجازه

النهارده كده أول ماصحيت من النوم " طبعا لفتره بسيطه وهادخل أكمل " قعدت أفكر فى أرخم فترة إمتحانات عدت عليه , ميد تيرم وعملى وشفوى وشيتات وفاينال , كان أيام صعبه بس الحمد لله ربنا بيسهلها دايماَ

كل اللى فات ده بقى كوم والأسبوع اللى كان قبل الأو إس كوم تانى , الطريقه الوحيده الى كنت بعرف اذاكر بيها , أقعد فوق المكتب وحواليا المرجع اللذيذ بتاع الماده والورق وحل الأسئله , والواحد كان دايما عنده شعور انه هايشيل الماده دى , بس الحمد لله الامتحان جه سهل جدا والواحد طلع مورتاح نفسيا

نيجى بقى للأجازه , بما إنها بدأت بشوية أخبار مش حلوه , بس أنا لسه عندى أمل انها تكون حلوه والواحد يعرف يستفيد منها .
هابدأها النهارده بسفريه صغيره كده ان شاء الله ولما ارجع هابدأ أنفذ مخططاتى بقى , وربنا معانا جميعا ف الأجازه دى ان شاء الله

وطبعا مع المخططات دى هايبقى فى شوية تربيه عسكريه , وشوية شغل ف مشروع التخرج و شوية شغل ويب لناس مأجلينهم من قبل الإمتحانات

ربنا يعينى وأقدر أخلص اللى ورايا كله وأعرف أتعلم الحاجات الجديده اللى عاوزها اللى هى أواكل

ربنا معانا ونقدر ننجز حاجات حلوه ف الأجازه دى , أشوفكم تانى صدفه
سلامز

OS-tor ya rab

النهارده داخل أسجل معاناة مادة الأو إس
أرخم ماده قابلتها من يوم مادخلت الكليه , الماده حلوه وبتتفهم لكن كبيره وفى حاجات عاوزه حفظ , والعبد لله الحمد لله يعنى حافظ اسمى ورقم موبايلى بالعافيه , حتى رقم البيت مسجله على الموبايل عشان مش عارف أحفظه :D .

أنا داخل اقول ان الماده دى كبيره اوى , ماده تخينه ورغايه رغى بنت........ , وبما ان البلوج بتاعى فلازم يكون متبهدل زيى وكل حاجه فيه بايظه , إن شاء الله لما ارجع من الإمتحان بكره , مش هاظبط البلوج :D هانام الأول وبعد اما أصحى بعد كام يوم كده هابقى أظبط البلوج تانى .

أنا عاوز كل اللى يدخل البلوج الأيام دى يدعيلى اوى , عشان كابوس الأو إس ده يعدىىىىى ان شاء الله
وأردهالكم فى جوازات عيالكم ان شاء الله
أشوفكم ف الأجازه بقى صدفه :D
ومعلش ياخفاجه اخدت تعليقك على الأو اس عنوان للموضوع :D

أودى وشى فين منك يافلسطين

من أول مالضرب بدأ فى فلسطين المره الأخيره دى وانا قولت مش هاتكلم , هاحاول أعمل أى حاجه تانيه غير الكلام
لكن للأسف لقيت نفسى متكتف وأكتر حاجه ممكن أعملها إنى أتكلم , ممكن الكلام يساعدهم لما يعرفوا اننا حاسين بيهم مابقيناش لسه جبلات,فقولت أتكلم وأقول أى حاجه
ربنا ينصرهم ان شاء الله

أنا عربى لكن مكسوف منك يافلسطيــــــــــــــــــــــــــــــــــــــــــــــــــن
صدقينى لو بإيدى كنت خليت نهار اليهود طيــــــــــــــــــــــــــــــــــــن
لو كنت أعرف أطير زى سوبر مان اوحتى زى بتوع الصيـــــــــــــن
كنت رميت نفسى فى حضنك وأموت بدل المره ستيــــــــــــــــــــــــــن
من جوايا نار قايده وحماسه تكفى من البشر ألفيـــــــــــــــــــــــــــــــــن
من زمان وأنا نفسى أموت شهيد زى شهداء حطيــــــــــــــــــــــــــــــن
نفسى أدافع عن أخويا وأختى اللى وسط الذل والحصار هناك عايشين
نفسى أصلى يوم فى القدس وأبكى نفسى أفديك ياتانى القبلتيـــــــــــــن
وبإذن الله هاحارب هاحارب غصب عن أطخن طخيـــــــــــــــــــــــن

المرايا

النهارده عن طريق الصدفه وانا بلف فى اليوتيوب لقيت فيديو لشاعر اسمه على سلامه
كان بيتكلم فيه عن الزمان اللى بيمر بسرعه , لدرجة اننا بنسى نفسنا ونتفاجئ لما نبص فى المرايا
كان بيفول:

قولت أبص في المرايا
يمكن أكون احلويت
فضلت داير أبص
ماخليتش ولا مرايا في البيت
في الحمام في الاودة في دولاب
او متعلقة علي الحيط
شفت
سكت شوية
وبعدين اتخضيت
معقولة انا ضيعت العمر ده كله
وزي مارحت زي ماجيت
معقولة أنا عمري ما فكرت ولا اتغيرت ولا حبيت
وازاي ساكت علي روحي ده كله
وليه استنيت
ياريتني ما كان عندي مرايا
وياريتني ما بصيت

بصراحه الكلام عجبنى جدا , والشاعر ده بجد كل كلامه جميل جدا وده لينك الفيديو
http://www.youtube.com/watch?v=6Mb1-d2UoP0&feature=related