سيارة مفخخة - على سلامة

اليوم خلاص قرّب يفوت ..

و ماعدش غيرى ع المحطة

و السكوت ..

و فرد أمن ..

بالصدفة كان فـ اليوم ده خدمة ..

محتاج لقلبك يا ترى

ولاَّ أنا ..

محتاج لـ هِدمة ؟

اليوم خلاص ..

ده خوف ده ولّا حِسّ ناس

بيطـُلّ من قلب البيوت ؟

لو لسّه بنحب الحياة ..

إزاى نموت ؟

اليوم خلاص

لكن عيونى ع الأمل

يمكن هنا ..

جايز هناك

تايه أنا

يا ربى مين

اللى مغمّى عيون الشباك ؟

بعيدة المسافة

بين حد أدنى للأجور

و رغيف و عتمة و وصل نور

و اربع حيطان

لاجل ما نكتب فـ استمارة المدرسة

عنوان سكن

بعيدة المسافة بين قلوبنا و الوطن

بعيدة المسافة بين مفيش

و لمّا تسأل ما تلاقيش

غير القلوب الضيّقة

نفس المسافة ..

بين عشوائية

و حياة طرية ناعمة آخر فخفخة !

خايف تكون كل الشوارع ..

سيارات مفخخة

قاصدة الوطن

كاتدرائية و مشيخة

يا ربى مين ..

وسط انشغالنا بمين هايحكم

و مين هايرحل

و مين شمال و مين يمين ؟

يا ربى مين ..

وسط انشغالنا بالزبالة

بيحرق الورد الجميل

و يسرق النيل الأمين ؟

يا ربى مين !
............................................

كـــــــــــــــان ليـــــه كلمــــــــــــه

كان ليا كلمة قبل ما اسيبك وتسيبينى
واذا كان كلامى تقيل عليكى استحملينى
وتعالى على نفسك ثوانى واسمعينى ووعد منى انى بكره مش هتلاقينى

كان ليا كلمة قبل ما اسيبك وتسيبينى
واذا كان كلامى تقيل عليكى استحملينى
وتعالى على نفسك ثوانى واسمعينى
ووعد منى انى بكره مش هتلاقينى

صدقينى دى اخر مره فيها هاتشوفينى
لو حته صدفه قابلنا بعض هدارى عينى
وانسى اللى كان مفروض بينك وبينى

صدقينى دى اخر مره فيها هاتشوفينى
لو حته صدفه قابلنا بعض هدارى عينى
وانسى اللى كان مفروض بينك وبينى

انا كنت فاكر انى غالى وانك انتى هاتحسى باللى عملته ليكى واللى عملتية ليا
كان نفسى عمرى ما كنت اقول عليكى بقيتى كونتى والبركه فيكى نسيتينى انك حبيبتى


صدقينى دى اخر مره فيها هاتشوفينى
لو حته صدفه قابلنه بعض هدارى عينى
وانسى اللى كان مفروض بينك وبينى

صدقينى دى اخر مره فيها هاتشوفينى
لو حته صدفه قابلنه بعض هدارى عينى
وانسى اللى كان مفروض بينك وبينى

ذكريااااااااات مييييح

السلام عليكم
النهارده وانا فى الأجازه ( اللى مش أجازه هى كام ساعه بس ) وأنا قاعد قدام الكمبيوتر ( اللى بقا بالنسبه ليه بزار سياحى بشوفه كل كام شهر مره :D )
وانا قاعد فى البيت ( اللى بئا بالنسبه ليه بنسيون حاجز فيه وجبه وسرير ) :D :D :D :D :D :D

سمعت أغنية جميله لمحمد حماقى اسمها (( ذكريات ميح))
عجبتنى اوى الأغنية دى وفكرت وانا بسمعها انى اقوم اقلب فى ادراجى اللى بحتفظ فيها بالذكريات الحلوه عشان أفتكر أيام زمان الحلوه.
فتحت الدرج لقيت أول حاجه نوته , كنت متعود دايما قبل ماافارق شخص بحبه سواء فى سفر او فى دراسه او شغل اخليه يكتبلى فى النوته دى حاجه للذكرى .
وأنا بقلب فى النوته دى رجعت لورا لأيام جميييييييييييييييييييله جدا .بداية من أيام الإعدادى والدراسه والاصدقاء الطيبين اللى تقريبا ماعرفش عن معظمهم أى حاجه دلوقتى. وافتكرت مواقف ضحكتنى ومواقف بكيتنى وخاصة لما يكون اللى كاتبلى كلمه فى النوته توفاه الله.
وجمب النوته دى لقيت بعض الهدايا الغالية عليه جدا من ناس عمرى مااقدر انساهم ولا أنسى أيامهم ... يمكن مفيش لكلماتهم مكان فى النوته عندى بس هم مش من الناس اللى ممكن يتنسوا بالرغم ان أيامهم عدت ومش راجعه تانى .

شعور جميل جدا حسيته النهارده وانا بقلب فى الاوراق بتاعتى ممكن مااقدرش أوصفه بالكلام ... بس كل اللى اقدر أقوله ان النسيان نعمه لان لو كنا مابننساش الأيام الحلوه دى ... كنا عمرنا مااقتنعنا ان فى ايام هاتيجى علينا اسعد من كده . بتمنى لكل الناس اللى ليهم مكان فى ذكرياتى ربنا يوفقهم ويبقوا دايما احسن ناس وبقولهم شكرا على كلماتكم وهداياكم اللى اتسببت ليه فى لحظات السعاده الى حسيتها لما شوفتها.

وفى النهايه أحب اقول الله يسامحك ياحماقى :D :D :D :D

ذكريات ميح