النهاردة وسط كل زحمة هموم الحياة
حبيت أفتكر أيام زمان وأيام الضحكه اللى من القلب
وحبيت أفتكر أحاسيس وذكريات زمان الجميلة
لقيتنى بتمنى أكون واحد شبههى أيام زمان
بس للأسف خلاص راحت أيام زمان
وصلت للنقطة ولسه بدور على أول السطر
الثلاثاء، 14 مايو 2013
الأربعاء، 8 مايو 2013
بقيت خـــــــــالو
بما إنى متعود أسجل اللحظات التاريخية فى حياتى على مدونتى المهجورة
فانا قررت النهاردة انى أسجل اللحظة التاريخية دى
وهى انى حصلت على لقب "خــــــــــــــــــــــــــالــــــــــــــــــــو" لما يوسف نور الدنيا
وكمان فى صدفة جميله اوى حصلت وهى انه اتولد فى نفس اليوم اللى انا اتولدت فيه
يعنى انا ويوسف ابن اختى عيد ميلادنا مع بعض يوم 4 مايو
نورت الدنيا يايوسف
الثلاثاء، 5 فبراير 2013
رسالة إلى الوالى
السيد رئيس الجمهورية
صباح الفل
أرسلك لسيادتك الخطاب رقم مليون وكلى أمل أن تقرأه ,, ما هو أصل مصريين غيرى كتير حاولوا يبعتولك نفس الخطاب
أنا : المواطن مصرى الذى يتعرض للإضهاد والمعاملة السيئة داخل بلده
الحكومات مابتحبناش ياريس ومبيهتموش بينا كل المسئولين بيفكروا فى فلوسهم واستثماراتهم وبس ,, ياريس المسئولين ياما
ظلموا فينا وبهدلونا كتير بس احنا مش فاضيين نرد عليهم
أيوه مش فاضيين نرد عليهم ,, لأننا بندور على شغل واللى شغال مننا بيتطحن فى شغله وفى اللى بيشتغل شغلانه تانيه عشان يعرف يعيش وفى اللى ساب البلد وهج منها
ياريس انت ماغيرتش حاجه ,, لسه كل حاجه زى ماهى
ليه ياريس ,, لسه الشباب بيتسحل ويتعرى ويتقتل
ليه ياريس ,, الغاز لسه بيروح إسرائيل ولسه مارجعتش فلوسنا اللى اتسرقت
ليه ياريس ,, عملت بيننا وبينك جدار عازل وبقيت عامل نفسك مش شايفنا
أنا زهقت ياريس ومبقتش عارف أدافع عنك أو ألتمس ليك العذر
أنا بسببك ياريس قالوا عنى إخوانى وخروف مع انى سر دفاعى عنك كان انى مش عاوز أول رئيس ييجى بعد الثورة يفشل
المهم دلوقتى أنا محتاج رد ,, رد علينا واثبتلنا انك رئيس الجمهورية وقادر انك تحكم بذاتك أو إمشى ياريس لأننا تعبنا خلاص
كلمنى ضرورى ياريس ,, الموضوع فى غاية الأهمية
ولو لقيت موبايلى قاطع شحن
رقم البيت معاك
والسلام ختام ياريس
الاشتراك في:
الرسائل (Atom)