إمبارح كان اخر يوم امتحانات فى الكليه , كنت حاسس بإحساس غريب كأنى اول مره رايح أمتحن , حاسس انى قاعد قعده غريبه وعندى شوية مشاعير(مشاعر يعنى) متضاربه , شوية فرحان وشويه زعلان وشويه بفتكر انى قاعد ف الامتحان ولازم احل اى حاجه.
بس فعلا امبارح كان يوم غريب , بدايته صحيت من النوم كنت لسه ماذاكرتش الا نص الماده , قعدت كملتها وقعدت افتكر كل الامتحانات اللى عدت عليه فى الكليه امتحان امتحان , ودكتور كل ماده ومحاضراته اللى انا حضرت جزء منها والمعيدين وزمايلى اللى شرحولى حاجات قبل الامتحان ودخلت حليتها على شرحهم , كلللل الشريط ده عدى عليه امبارح , بسرعه امتحنت 41 ماده فى الكليه ( ده عشان حقوق الإنسان) .
بس النهارده انا مفتقد شعور الكليه , شعور انى كنت المفروض هاحضر محاضرات كمان فتره مع اصحابى , وهاخرج مع اصحابى اللى عارفهم بئالى 4 سنين , بس هى دى سنة الحياه , لازم كل مرحله تنتهى وندخل فى مرحله تانيه وسط ناس تانيين .
فى الاخر عاوز اشكر كل زمايلى واصحابى اللى ساعدونى فى الكليه , وبشكر منتدى نور الهدى ومنتدى كلية الحاسبات والمعلومات, وطبعا بشكر اخواتى واصحابى على صيام وعبد الله رمضان , وربنا معانا جميعا ان شاء الله .
هناك تعليقان (2):
اولا كده
كفااااااااارة على إنتهاء الإمتحانات :)
بس فعلا الإحساس ده صعب قوي
ربنا معاك يا رب
وتبقي الأيام الجاية أحسن
وتقول يا ريتني أتخرجت من زمان
حد لاقى يتخرج وهو لسه عنده شوية عقل
وخصوصا من سى اس :)
حضرتك فى نعمة :)
ربنا يسترهاا عليناااا
يعني من ناحية الإيجابيات فهي كتيرة
معدش فجاة هتلاقى وراك تسليم 7 شيتات و15 مشروع و13 إمتحان فى يومين :)
مع أن هما كلهم 5 مواد فى الترم أو 6 :)
ومعدش حد فى المحاضرة هيقولك يا جاااهل
ولا حد هيقولك دي معلومات ابتدائي
ولا حد هيقولك أنت ازاى وصلت لسنة رابعة وماتعرفش الكلام ده؟؟؟ :))
وطبعا كل الكلام ده تحت الشعار اللى بأرفعه ساعات "بص للإيجابيات" :) نتيجة لبعض التهييس :)
سلاااام
ربنا يجمعنا على خير ان شاء الله يا معلم :)
احجزلي جمبك في الجيش :D :D
إرسال تعليق