سيارة مفخخة - على سلامة

اليوم خلاص قرّب يفوت ..

و ماعدش غيرى ع المحطة

و السكوت ..

و فرد أمن ..

بالصدفة كان فـ اليوم ده خدمة ..

محتاج لقلبك يا ترى

ولاَّ أنا ..

محتاج لـ هِدمة ؟

اليوم خلاص ..

ده خوف ده ولّا حِسّ ناس

بيطـُلّ من قلب البيوت ؟

لو لسّه بنحب الحياة ..

إزاى نموت ؟

اليوم خلاص

لكن عيونى ع الأمل

يمكن هنا ..

جايز هناك

تايه أنا

يا ربى مين

اللى مغمّى عيون الشباك ؟

بعيدة المسافة

بين حد أدنى للأجور

و رغيف و عتمة و وصل نور

و اربع حيطان

لاجل ما نكتب فـ استمارة المدرسة

عنوان سكن

بعيدة المسافة بين قلوبنا و الوطن

بعيدة المسافة بين مفيش

و لمّا تسأل ما تلاقيش

غير القلوب الضيّقة

نفس المسافة ..

بين عشوائية

و حياة طرية ناعمة آخر فخفخة !

خايف تكون كل الشوارع ..

سيارات مفخخة

قاصدة الوطن

كاتدرائية و مشيخة

يا ربى مين ..

وسط انشغالنا بمين هايحكم

و مين هايرحل

و مين شمال و مين يمين ؟

يا ربى مين ..

وسط انشغالنا بالزبالة

بيحرق الورد الجميل

و يسرق النيل الأمين ؟

يا ربى مين !
............................................